ma la roba pì bela in istà
l'era corare in casa 
sbrissiando par la pressia
de perder anca na s-cianta de zugo
e ber dal minestro
infogà
quel'acqua
parecià par la sera
ciara ciara
cossì bona
che parea che dio in persona
coe so man
te stesse spetando
proprio ti
che te mancava sol de solare
par stare come lù
pien de anzoleti dapartuto
de la to età
che i ridea chè i savea che te gavei za vinto.

*

su par le scale
el disea to papà
a na zerta ora
el lo disea da bon
con chel modo che te capii
che l'era l'ora dei grandi
che zò i discorea pian pian
cossa i se contava no te capivi
i parea quasi i useleti
quando i si cata sul ramo a du a du
e si mete d'acordo
de far i oveti
sul sereso tuto inovolà de rosa
e ti dormivi anca par finta
e te te insognavi vestia da sposa
che te corei contenta come el fior azureto
che el se distaca e el va su su par aria
a s-ciararghe i oci a la madona.